ਅੰਮ੍ਰਿਤਸਰ, 30 ਅਕਤੂਬਰ 2026: ਸ੍ਰੀ ਗੁਰੂ ਰਾਮਦਾਸ ਜੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦਾ ਸਰਦ ਰੁੱਤ (ਵਿੰਟਰ) ਦਾ ਨਵਾਂ ਉਡਾਣ ਸ਼ਡਿਊਲ ਅਧਿਕਾਰਤ ਤੌਰ ’ਤੇ ਜਾਰੀ ਕਰ ਦਿੱਤਾ ਗਿਆ ਹੈ। ਇਸ ਸਮਾਂ-ਸਾਰਣੀ ਵਿੱਚ ਘਰੇਲੂ ਅਤੇ ਕੌਮਾਂਤਰੀ ਉਡਾਣਾਂ ਦੇ ਆਗਮਨ ਤੇ ਰਵਾਨਗੀ ਦੀਆਂ ਕੁੱਲ 84 ਐਂਟਰੀਆਂ ਦਰਜ ਕੀਤੀਆਂ ਗਈਆਂ ਹਨ। ਨਵੇਂ ਸ਼ਡਿਊਲ ਨਾਲ ਯਾਤਰੀਆਂ ਨੂੰ ਦੇਸ਼-ਵਿਦੇਸ਼ ਦੇ ਕਈ ਪ੍ਰਮੁੱਖ ਸ਼ਹਿਰਾਂ ਲਈ ਹਵਾਈ ਸਫ਼ਰ ਦੀ ਸਹੂਲਤ ਮਿਲੇਗੀ।
ਨਵੇਂ ਸ਼ਡਿਊਲ ਅਨੁਸਾਰ ਘਰੇਲੂ ਉਡਾਣਾਂ ਰਾਹੀਂ ਦਿੱਲੀ, ਮੁੰਬਈ, ਪੁਣੇ, ਬੈਂਗਲੁਰੂ, ਅਹਿਮਦਾਬਾਦ, ਸ੍ਰੀਨਗਰ ਅਤੇ ਨੋਇਡਾ ਸਮੇਤ ਕਈ ਸ਼ਹਿਰਾਂ ਨਾਲ ਹਵਾਈ ਸੰਪਰਕ ਬਣਿਆ ਰਹੇਗਾ। ਇਨ੍ਹਾਂ ਵਿੱਚ ਦਿੱਲੀ ਲਈ ਸਭ ਤੋਂ ਵੱਧ ਉਡਾਣਾਂ ਨਿਰਧਾਰਤ ਕੀਤੀਆਂ ਗਈਆਂ ਹਨ।
ਇਸੇ ਤਰ੍ਹਾਂ ਕੌਮਾਂਤਰੀ ਉਡਾਣਾਂ ਰਾਹੀਂ ਯਾਤਰੀ ਕੁਆਲਾਲੰਪੁਰ, ਦੁਬਈ, ਸ਼ਾਰਜਾਹ, ਅਬੂ ਧਾਬੀ, ਦੋਹਾ, ਸਿੰਗਾਪੁਰ, ਬਰਮਿੰਘਮ ਅਤੇ ਬੈਂਕਾਕ ਵਰਗੀਆਂ ਵਿਦੇਸ਼ੀ ਮੰਜ਼ਿਲਾਂ ਤੱਕ ਸਫ਼ਰ ਕਰ ਸਕਣਗੇ।
ਘਰੇਲੂ ਤੇ ਕੌਮਾਂਤਰੀ ਉਡਾਣਾਂ ਲਈ 42-42 ਐਂਟਰੀਆਂ
ਜਾਰੀ ਕੀਤੇ ਗਏ ਸ਼ਡਿਊਲ ਦੇ ਵੇਰਵਿਆਂ ਮੁਤਾਬਕ ਘਰੇਲੂ ਉਡਾਣਾਂ ਦੇ ਆਗਮਨ ਅਤੇ ਰਵਾਨਗੀ ਲਈ 21-21 ਐਂਟਰੀਆਂ ਰੱਖੀਆਂ ਗਈਆਂ ਹਨ। ਇਸੇ ਤਰ੍ਹਾਂ ਕੌਮਾਂਤਰੀ ਉਡਾਣਾਂ ਦੇ ਆਉਣ ਅਤੇ ਜਾਣ ਲਈ ਵੀ 21-21 ਐਂਟਰੀਆਂ ਦਰਜ ਕੀਤੀਆਂ ਗਈਆਂ ਹਨ। ਹਾਲਾਂਕਿ, ਸ਼ਡਿਊਲ ਵਿੱਚ ਸ਼ਾਮਲ ਕੁਝ ਉਡਾਣਾਂ ਦਾ ਸੰਚਾਲਨ ਅਜੇ ਸ਼ੁਰੂ ਨਹੀਂ ਹੋਇਆ ਹੈ।
ਇਨ੍ਹਾਂ ਵਿੱਚ ਅਕਾਸਾ ਏਅਰ ਦੀ ਅਬੂ ਧਾਬੀ, ਬਾਟਿਕ ਏਅਰ ਅਤੇ ਏਅਰ ਏਸ਼ੀਆ ਦੀ ਕੁਆਲਾਲੰਪੁਰ ਅਤੇ ਥਾਈ ਲਾਇਨ ਏਅਰ ਦੀ ਬੈਂਕਾਕ ਉਡਾਣ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਮਲੇਸ਼ੀਆ ਏਅਰਲਾਈਨਜ਼ ਦੀਆਂ ਕੁਆਲਾਲੰਪੁਰ ਲਈ ਜਾਣ ਵਾਲੀਆਂ ਅਤੇ ਉੱਥੋਂ ਵਾਪਸ ਆਉਣ ਵਾਲੀਆਂ ਕੁਝ ਉਡਾਣਾਂ ਦੇ ਸਮੇਂ ਅਤੇ ਸੰਚਾਲਨ ਦੇ ਦਿਨਾਂ ਵਿੱਚ ਵੀ ਨਿਰਧਾਰਤ ਮਿਆਦ ਅਨੁਸਾਰ ਤਬਦੀਲੀਆਂ ਕੀਤੀਆਂ ਗਈਆਂ ਹਨ।
ਘਰੇਲੂ ਰੂਟਾਂ ’ਤੇ ਦਿੱਲੀ ਲਈ ਸਭ ਤੋਂ ਵੱਧ ਉਡਾਣਾਂ
ਘਰੇਲੂ ਹਵਾਈ ਸੇਵਾਵਾਂ ਦੇ ਖੇਤਰ ਵਿੱਚ ਏਅਰ ਇੰਡੀਆ, ਏਅਰ ਇੰਡੀਆ ਐਕਸਪ੍ਰੈੱਸ ਅਤੇ ਇੰਡੀਗੋ ਵੱਲੋਂ ਉਡਾਣਾਂ ਚਲਾਈਆਂ ਜਾ ਰਹੀਆਂ ਹਨ। ਦਿੱਲੀ ਲਈ ਦਿਨ ਭਰ ਕਈ ਉਡਾਣਾਂ ਉਪਲਬਧ ਹੋਣਗੀਆਂ। ਇਸ ਤੋਂ ਇਲਾਵਾ ਮੁੰਬਈ ਅਤੇ ਪੁਣੇ ਵਰਗੇ ਵੱਡੇ ਕਾਰੋਬਾਰੀ ਕੇਂਦਰਾਂ ਲਈ ਵੀ ਨਿਯਮਿਤ ਹਵਾਈ ਸੇਵਾਵਾਂ ਰੱਖੀਆਂ ਗਈਆਂ ਹਨ। ਬੈਂਗਲੁਰੂ, ਅਹਿਮਦਾਬਾਦ, ਸ੍ਰੀਨਗਰ ਅਤੇ ਨੋਇਡਾ ਲਈ ਵੀ ਉਡਾਣਾਂ ਸ਼ਡਿਊਲ ਦਾ ਹਿੱਸਾ ਹਨ।
ਕੁਆਲਾਲੰਪੁਰ ਅਤੇ ਖਾੜੀ ਦੇਸ਼ਾਂ ਲਈ ਵੀ ਹਵਾਈ ਸੰਪਰਕ
ਕੌਮਾਂਤਰੀ ਉਡਾਣਾਂ ਵਿੱਚ ਮਲੇਸ਼ੀਆ ਏਅਰਲਾਈਨਜ਼ ਵੱਲੋਂ ਕੁਆਲਾਲੰਪੁਰ ਲਈ ਕਈ ਸੇਵਾਵਾਂ ਨਿਰਧਾਰਤ ਕੀਤੀਆਂ ਗਈਆਂ ਹਨ। ਨਵੰਬਰ ਤੋਂ ਮਾਰਚ ਤੱਕ ਵੱਖ-ਵੱਖ ਮਹੀਨਿਆਂ ਦੌਰਾਨ ਇਨ੍ਹਾਂ ਉਡਾਣਾਂ ਦੇ ਸਮੇਂ ਅਤੇ ਸੰਚਾਲਨ ਵਾਲੇ ਦਿਨਾਂ ਵਿੱਚ ਤਬਦੀਲੀਆਂ ਲਾਗੂ ਰਹਿਣਗੀਆਂ।
ਖਾੜੀ ਦੇਸ਼ਾਂ ਲਈ ਦੁਬਈ ਅਤੇ ਸ਼ਾਰਜਾਹ ਵਾਸਤੇ ਨਿਯਮਿਤ ਉਡਾਣਾਂ ਉਪਲਬਧ ਰਹਿਣਗੀਆਂ। ਇਸ ਤੋਂ ਇਲਾਵਾ ਦੋਹਾ, ਅਬੂ ਧਾਬੀ, ਸਿੰਗਾਪੁਰ ਅਤੇ ਬਰਮਿੰਘਮ ਲਈ ਵੀ ਹਵਾਈ ਸੇਵਾਵਾਂ ਸ਼ਡਿਊਲ ਵਿੱਚ ਸ਼ਾਮਲ ਹਨ। ਬੈਂਕਾਕ ਲਈ ਵੀ ਉਡਾਣਾਂ ਦਰਜ ਕੀਤੀਆਂ ਗਈਆਂ ਹਨ, ਹਾਲਾਂਕਿ ਇਨ੍ਹਾਂ ਦਾ ਸੰਚਾਲਨ ਅਜੇ ਸ਼ੁਰੂ ਹੋਣਾ ਬਾਕੀ ਹੈ।