ਨਵੀਂ ਦਿੱਲੀ, 22 ਜੂਨ 2026: ਦੇਸ਼ ਭਰ ਵਿੱਚ ਐਲਪੀਜੀ ਕੁਨੈਕਸ਼ਨ ਬੰਦ ਹੋਣ ਦੀਆਂ ਅਫਵਾਹਾਂ ਦਰਮਿਆਨ ਕੇਂਦਰ ਸਰਕਾਰ ਨੇ ਸਪੱਸ਼ਟ ਕੀਤਾ ਹੈ ਕਿ ਫਿਲਹਾਲ ਐਲਪੀਜੀ ਸਪਲਾਈ ਜਾਂ ਕੁਨੈਕਸ਼ਨਾਂ ਨੂੰ ਬੰਦ ਕਰਨ ਦਾ ਕੋਈ ਆਦੇਸ਼ ਜਾਰੀ ਨਹੀਂ ਕੀਤਾ ਗਿਆ। ਇੰਡੇਨ, ਭਾਰਤ ਗੈਸ ਅਤੇ ਐਚਪੀ ਗੈਸ ਦੇ ਗਾਹਕਾਂ ਨੂੰ ਪਹਿਲਾਂ ਵਾਂਗ ਹੀ ਸਿਲੰਡਰ ਸਪਲਾਈ ਜਾਰੀ ਰਹੇਗੀ।
ਸਰਕਾਰ ਨੇ ਕਿਹਾ ਹੈ ਕਿ 30 ਜੂਨ ਤੋਂ ਬਾਅਦ ਵੀ ਦੇਸ਼ ਵਿੱਚ ਐਲਪੀਜੀ ਕੁਨੈਕਸ਼ਨ ਕੱਟਣ ਜਾਂ ਰੋਕਣ ਦੀ ਕੋਈ ਯੋਜਨਾ ਨਹੀਂ ਹੈ। ਹਾਲਾਂਕਿ, ਊਰਜਾ ਖੇਤਰ ਵਿੱਚ ਸਾਫ਼-ਸੁਥਰੇ ਅਤੇ ਵਾਤਾਵਰਣ-ਅਨੁਕੂਲ ਵਿਕਲਪ ਵਜੋਂ ਪਾਈਪਡ ਨੈਚਰਲ ਗੈਸ (PNG) ਨੂੰ ਉਤਸ਼ਾਹਿਤ ਕਰਨ ਦੀ ਨੀਤੀ ਲਗਾਤਾਰ ਅੱਗੇ ਵਧਾਈ ਜਾ ਰਹੀ ਹੈ।
ਨਵਾਂ ਐਲਪੀਜੀ–ਪੀਐਨਜੀ ਨਿਯਮ ਕੀ ਹੈ?
ਕੇਂਦਰ ਸਰਕਾਰ ਵੱਲੋਂ ਮਾਰਚ 2026 ਵਿੱਚ ਜਾਰੀ ਕੀਤੀ ਗਈ ਨੀਤੀ ਅਨੁਸਾਰ ਉਹ ਖੇਤਰ ਜਿੱਥੇ PNG ਨੈੱਟਵਰਕ ਉਪਲਬਧ ਹੈ, ਉੱਥੇ ਲੋਕਾਂ ਨੂੰ ਹੌਲੀ-ਹੌਲੀ PNG ਵੱਲ ਜਾਣ ਲਈ ਉਤਸ਼ਾਹਿਤ ਕੀਤਾ ਜਾ ਰਿਹਾ ਹੈ। ਇਸ ਤਹਿਤ “ਨੋ ਡੁਅਲ ਕਨੈਕਸ਼ਨ ਪਾਲਿਸੀ” ਲਾਗੂ ਕੀਤੀ ਗਈ ਹੈ।
ਇਸ ਨੀਤੀ ਅਨੁਸਾਰ:
- ਜਿਨ੍ਹਾਂ ਘਰਾਂ ਵਿੱਚ ਪਹਿਲਾਂ ਹੀ PNG ਕੁਨੈਕਸ਼ਨ ਹੈ, ਉਹ ਨਵਾਂ LPG ਕੁਨੈਕਸ਼ਨ ਨਹੀਂ ਲੈ ਸਕਣਗੇ।
- ਕੁਝ ਮਾਮਲਿਆਂ ਵਿੱਚ ਉਨ੍ਹਾਂ ਨੂੰ LPG ਕੁਨੈਕਸ਼ਨ ਛੱਡਣ ਲਈ ਵੀ ਕਿਹਾ ਜਾ ਸਕਦਾ ਹੈ।
- ਉਦੇਸ਼ ਦੋਹਰੇ ਕੁਨੈਕਸ਼ਨਾਂ ਨੂੰ ਰੋਕਣਾ ਅਤੇ ਸਪਲਾਈ ਪ੍ਰਣਾਲੀ ਨੂੰ ਸੁਚਾਰੂ ਬਣਾਉਣਾ ਹੈ।
ਸਰਕਾਰ ਦਾ ਤਰਕ ਕੀ ਹੈ?
ਤੇਲ ਮੰਤਰਾਲੇ ਅਤੇ ਸਰਕਾਰੀ ਤੇਲ ਕੰਪਨੀਆਂ ਦਾ ਕਹਿਣਾ ਹੈ ਕਿ PNG, LPG ਦੇ ਮੁਕਾਬਲੇ ਵਧੇਰੇ:
- ਸੁਰੱਖਿਅਤ ਹੈ
- ਵਾਤਾਵਰਣ ਲਈ ਘੱਟ ਪ੍ਰਦੂਸ਼ਣ ਵਾਲਾ ਹੈ
- ਅਤੇ ਲਗਾਤਾਰ ਸਪਲਾਈ ਦੇਣ ਵਾਲਾ ਪ੍ਰਣਾਲੀ ਹੈ
ਇਸ ਨਾਲ ਸਿਲੰਡਰ ਬੁਕਿੰਗ ਦੀ ਲੋੜ ਖਤਮ ਹੋ ਜਾਂਦੀ ਹੈ ਅਤੇ ਘਰਾਂ ਤੱਕ ਗੈਸ ਦੀ ਸਿੱਧੀ ਸਪਲਾਈ ਮਿਲਦੀ ਹੈ। ਆਵਾਜਾਈ ਅਤੇ ਡਿਲੀਵਰੀ ਖਰਚ ਵੀ ਘਟਦਾ ਹੈ।
ਅੰਕੜੇ ਕੀ ਦੱਸਦੇ ਹਨ?
ਪੈਟਰੋਲੀਅਮ ਮੰਤਰਾਲੇ ਦੇ ਅੰਕੜਿਆਂ ਮੁਤਾਬਕ ਮਾਰਚ 2026 ਤੋਂ ਹੁਣ ਤੱਕ:
- 10 ਲੱਖ ਤੋਂ ਵੱਧ ਨਵੇਂ PNG ਕੁਨੈਕਸ਼ਨ ਚਾਲੂ ਕੀਤੇ ਗਏ ਹਨ
- ਲਗਭਗ 1 ਲੱਖ ਘਰਾਂ ਨੇ LPG ਤੋਂ PNG ਵੱਲ ਬਦਲਾਅ ਕੀਤਾ ਹੈ
ਸਰਕਾਰ ਦੀ ਸਪਸ਼ਟਤਾ
ਸਰਕਾਰ ਨੇ ਦੁਹਰਾਇਆ ਹੈ ਕਿ ਦੇਸ਼ ਭਰ ਵਿੱਚ LPG ਕੁਨੈਕਸ਼ਨ ਪੂਰੀ ਤਰ੍ਹਾਂ ਬੰਦ ਕਰਨ ਜਾਂ ਖਤਮ ਕਰਨ ਦੀ ਕੋਈ ਯੋਜਨਾ ਨਹੀਂ ਹੈ। ਲੋਕ ਆਪਣੀ ਸਹੂਲਤ ਅਤੇ ਉਪਲਬਧਤਾ ਅਨੁਸਾਰ LPG ਜਾਂ PNG ਵਿੱਚੋਂ ਕਿਸੇ ਵੀ ਵਿਕਲਪ ਦੀ ਵਰਤੋਂ ਜਾਰੀ ਰੱਖ ਸਕਦੇ ਹਨ।