ਤਿਕੋਣੀ ਸੀਰੀਜ਼ ਦੇ ਪਹਿਲੇ ਮੈਚ ‘ਚ ਅੱਜ ਭਿੜਣਗੇ ਭਾਰਤ ਏ ਅਤੇ ਸ਼੍ਰੀਲੰਕਾ ਏ

ਨਵੀਂ ਦਿੱਲੀ/ਸ਼੍ਰੀਲੰਕਾ, 09 ਜੂਨ 2026: ਸ਼੍ਰੀਲੰਕਾ ਵਿੱਚ ਸ਼ੁਰੂ ਹੋ ਰਹੀ ਵਨਡੇ ਤਿਕੋਣੀ ਲੜੀ ਦਾ ਪਹਿਲਾ ਮੁਕਾਬਲਾ ਅੱਜ ਭਾਰਤ ਏ ਅਤੇ ਸ਼੍ਰੀਲੰਕਾ ਏ ਵਿਚਾਲੇ ਖੇਡਿਆ ਜਾਵੇਗਾ। ਇਹ ਮੈਚ ਦਾਂਬੁਲਾ ਦੇ Rangiri Dambulla International Stadium ਵਿੱਚ ਸਵੇਰੇ 10:00 ਵਜੇ ਸ਼ੁਰੂ ਹੋਵੇਗਾ। ਇਸ ਟੂਰਨਾਮੈਂਟ ਵਿੱਚ ਤੀਜੀ ਟੀਮ ਅਫਗਾਨਿਸਤਾਨ ਏ ਹੈ, ਜਿਸ ਨਾਲ ਮੁਕਾਬਲੇ ਹੋਰ ਵੀ ਦਿਲਚਸਪ ਬਣਨ ਦੀ ਉਮੀਦ ਹੈ।

ਭਾਰਤ ਏ ਦੀ ਅਗਵਾਈ ਨੌਜਵਾਨ ਬੱਲੇਬਾਜ਼ Tilak Varma ਕਰ ਰਹੇ ਹਨ, ਜਦਕਿ Ruturaj Gaikwad ਨੂੰ ਉਪ-ਕਪਤਾਨ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਟੀਮ ਵਿੱਚ ਸਭ ਤੋਂ ਵੱਧ ਚਰਚਾ 15 ਸਾਲਾ ਸਨਸਨੀਖੇਜ਼ ਬੱਲੇਬਾਜ਼ Vaibhav Suryavanshi ਨੂੰ ਲੈ ਕੇ ਹੈ, ਜੋ ਆਈਪੀਐਲ ਤੋਂ ਬਾਅਦ ਪਹਿਲੀ ਵਾਰ ਮੈਦਾਨ ਵਿੱਚ ਉਤਰੇਗਾ।

ਵੈਭਵ ਸੂਰਿਆਵੰਸ਼ੀ ‘ਤੇ ਹੋਣਗੀਆਂ ਸਭ ਦੀਆਂ ਨਜ਼ਰਾਂ

ਆਈਪੀਐਲ 2026 ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਵੈਭਵ ਸੂਰਿਆਵੰਸ਼ੀ ਨੇ 776 ਦੌੜਾਂ ਬਣਾਈਆਂ ਅਤੇ ਟੂਰਨਾਮੈਂਟ ਦੀ ਔਰੇਂਜ ਕੈਪ ਆਪਣੇ ਨਾਮ ਕੀਤੀ। ਇਸ ਤੋਂ ਇਲਾਵਾ ਉਸਨੇ ਸਭ ਤੋਂ ਕੀਮਤੀ ਖਿਡਾਰੀ (MVP), ਸਾਲ ਦਾ ਉੱਭਰਦਾ ਖਿਡਾਰੀ, ਸੁਪਰ ਸਟ੍ਰਾਈਕਰ ਅਤੇ ਸਭ ਤੋਂ ਵੱਧ ਛੱਕੇ ਲਗਾਉਣ ਵਾਲੇ ਖਿਡਾਰੀ ਦੇ ਸਨਮਾਨ ਵੀ ਹਾਸਲ ਕੀਤੇ।

ਉਸਦਾ ਸਭ ਤੋਂ ਯਾਦਗਾਰ ਪ੍ਰਦਰਸ਼ਨ 36 ਗੇਂਦਾਂ ਵਿੱਚ ਤਾਬੜਤੋੜ ਸੈਂਕੜਾ ਸੀ, ਜਿਸ ਨੇ ਕ੍ਰਿਕਟ ਜਗਤ ਦਾ ਧਿਆਨ ਆਪਣੀ ਵੱਲ ਖਿੱਚਿਆ। ਇਸ ਸੀਜ਼ਨ ਦੌਰਾਨ ਉਹ ਤਿੰਨ ਵਾਰ 90 ਤੋਂ 100 ਦੌੜਾਂ ਦੇ ਵਿਚਕਾਰ ਆਊਟ ਹੋਇਆ, ਜੋ ਉਸਦੀ ਲਗਾਤਾਰਤਾ ਨੂੰ ਦਰਸਾਉਂਦਾ ਹੈ।

ਹਾਲੀਆ ਰਿਕਾਰਡ ਵਿੱਚ ਸ਼੍ਰੀਲੰਕਾ ਏ ਨੂੰ ਬੜ੍ਹਤ

ਭਾਰਤ ਏ ਅਤੇ ਸ਼੍ਰੀਲੰਕਾ ਏ ਵਿਚਾਲੇ ਖੇਡੇ ਗਏ ਪਿਛਲੇ ਪੰਜ ਮੈਚਾਂ ਦੇ ਅੰਕੜਿਆਂ ‘ਤੇ ਨਜ਼ਰ ਮਾਰੀ ਜਾਵੇ ਤਾਂ ਸ਼੍ਰੀਲੰਕਾ ਏ ਦਾ ਪੱਲਾ ਭਾਰੀ ਨਜ਼ਰ ਆਉਂਦਾ ਹੈ। ਇਨ੍ਹਾਂ ਪੰਜ ਮੁਕਾਬਲਿਆਂ ਵਿੱਚ ਸ਼੍ਰੀਲੰਕਾ ਨੇ ਦੋ ਜਿੱਤਾਂ ਦਰਜ ਕੀਤੀਆਂ ਹਨ, ਜਦਕਿ ਭਾਰਤ ਏ ਸਿਰਫ਼ ਇੱਕ ਮੈਚ ਜਿੱਤ ਸਕਿਆ ਹੈ। ਬਾਕੀ ਦੋ ਮੈਚ ਮੀਂਹ ਕਾਰਨ ਰੱਦ ਹੋ ਗਏ ਸਨ।

ਦੋਵਾਂ ਟੀਮਾਂ ਵਿਚਾਲੇ ਖੇਡਿਆ ਗਿਆ ਆਖਰੀ ਮੁਕਾਬਲਾ 15 ਜੂਨ 2019 ਨੂੰ ਹੋਇਆ ਸੀ, ਜਿਸ ਵਿੱਚ ਸ਼੍ਰੀਲੰਕਾ ਏ ਨੇ 7 ਵਿਕਟਾਂ ਨਾਲ ਜਿੱਤ ਦਰਜ ਕੀਤੀ ਸੀ। ਹਾਲਾਂਕਿ ਇਸ ਤੋਂ ਪਹਿਲਾਂ 8 ਜੂਨ 2019 ਨੂੰ ਭਾਰਤ ਏ ਨੇ ਸ਼੍ਰੀਲੰਕਾ ਨੂੰ 10 ਵਿਕਟਾਂ ਨਾਲ ਕਰਾਰੀ ਹਾਰ ਦਿੱਤੀ ਸੀ।

ਤਿਲਕ ਵਰਮਾ ਅਤੇ ਗਾਇਕਵਾੜ ‘ਤੇ ਹੋਵੇਗੀ ਵੱਡੀ ਜ਼ਿੰਮੇਵਾਰੀ

ਭਾਰਤ ਏ ਦੇ ਕਪਤਾਨ ਤਿਲਕ ਵਰਮਾ ਹਾਲੀਆ ਮੈਚਾਂ ਵਿੱਚ ਚੰਗੀ ਫਾਰਮ ਵਿੱਚ ਰਹੇ ਹਨ। ਉਨ੍ਹਾਂ ਨੇ ਪੰਜ ਮੈਚਾਂ ਵਿੱਚ 176 ਦੌੜਾਂ ਬਣਾਈਆਂ ਹਨ ਅਤੇ ਟੀਮ ਨੂੰ ਉਨ੍ਹਾਂ ਤੋਂ ਇੱਕ ਵੱਡੀ ਪਾਰੀ ਦੀ ਉਮੀਦ ਹੋਵੇਗੀ।

ਦੂਜੇ ਪਾਸੇ, ਰਿਆਨ ਪਰਾਗ ਦੀ ਗੈਰਹਾਜ਼ਰੀ ਟੀਮ ਲਈ ਇੱਕ ਝਟਕਾ ਮੰਨੀ ਜਾ ਰਹੀ ਹੈ। ਪਰਾਗ ਨੇ ਆਪਣੇ ਪਿਛਲੇ ਨੌਂ ਮੈਚਾਂ ਵਿੱਚ 238 ਦੌੜਾਂ ਬਣਾਈਆਂ ਸਨ ਅਤੇ ਉਹ ਭਾਰਤ ਏ ਦੇ ਸਭ ਤੋਂ ਸਫਲ ਬੱਲੇਬਾਜ਼ ਰਹੇ ਹਨ। ਪਰ ਆਈਪੀਐਲ ਦੌਰਾਨ ਹੈਮਸਟ੍ਰਿੰਗ ਦੀ ਸੱਟ ਕਾਰਨ ਉਹ ਇਸ ਟੂਰਨਾਮੈਂਟ ਵਿੱਚ ਨਹੀਂ ਖੇਡ ਰਹੇ। ਉਨ੍ਹਾਂ ਦੀ ਥਾਂ ਰੁਤੁਰਾਜ ਗਾਇਕਵਾੜ ਨੂੰ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।

ਗੇਂਦਬਾਜ਼ੀ ਹਮਲੇ ਦੀ ਅਗਵਾਈ ਕਰਨਗੇ ਨਿਸ਼ਾਂਤ ਸਿੰਧੂ

ਗੇਂਦਬਾਜ਼ੀ ਵਿਭਾਗ ਵਿੱਚ Nishant Sindhu ਭਾਰਤ ਏ ਦੇ ਸਭ ਤੋਂ ਭਰੋਸੇਮੰਦ ਗੇਂਦਬਾਜ਼ ਵਜੋਂ ਸਾਹਮਣੇ ਆਏ ਹਨ। ਉਨ੍ਹਾਂ ਨੇ 10 ਮੈਚਾਂ ਵਿੱਚ 22 ਵਿਕਟਾਂ ਆਪਣੇ ਨਾਮ ਕੀਤੀਆਂ ਹਨ। ਇਸ ਤੋਂ ਇਲਾਵਾ Anshul Kamboj ਅਤੇ Arshad Khan ਵੀ ਟੀਮ ਦੀ ਗੇਂਦਬਾਜ਼ੀ ਨੂੰ ਮਜ਼ਬੂਤੀ ਪ੍ਰਦਾਨ ਕਰਨਗੇ।

21 ਜੂਨ ਨੂੰ ਖੇਡਿਆ ਜਾਵੇਗਾ ਫਾਈਨਲ

ਤਿਕੋਣੀ ਲੜੀ ਵਿੱਚ ਤਿੰਨਾਂ ਟੀਮਾਂ ਲੀਗ ਪੜਾਅ ਦੌਰਾਨ ਇੱਕ-ਦੂਜੇ ਨਾਲ ਦੋ-ਦੋ ਮੈਚ ਖੇਡਣਗੀਆਂ। ਇਸ ਤੋਂ ਬਾਅਦ ਅੰਕ ਸੂਚੀ ਵਿੱਚ ਸਿਖਰ ਦੀਆਂ ਦੋ ਟੀਮਾਂ 21 ਜੂਨ ਨੂੰ ਫਾਈਨਲ ਵਿੱਚ ਖਿਤਾਬ ਲਈ ਆਮਨੇ-ਸਾਮਨੇ ਹੋਣਗੀਆਂ।

ਭਾਰਤ ਏ ਆਪਣਾ ਦੂਜਾ ਮੈਚ 11 ਜੂਨ ਨੂੰ ਅਫਗਾਨਿਸਤਾਨ ਏ ਖ਼ਿਲਾਫ਼ ਖੇਡੇਗਾ। ਇਸ ਤੋਂ ਬਾਅਦ 15 ਜੂਨ ਨੂੰ ਮੁੜ ਸ਼੍ਰੀਲੰਕਾ ਏ ਨਾਲ ਅਤੇ 17 ਜੂਨ ਨੂੰ ਅਫਗਾਨਿਸਤਾਨ ਏ ਨਾਲ ਭਿੜੇਗਾ। ਇਸ ਲੜੀ ਨੂੰ ਨੌਜਵਾਨ ਖਿਡਾਰੀਆਂ ਲਈ ਆਪਣੇ ਹੁਨਰ ਦਾ ਪ੍ਰਦਰਸ਼ਨ ਕਰਨ ਅਤੇ ਭਵਿੱਖ ਦੀ ਭਾਰਤੀ ਸੀਨੀਅਰ ਟੀਮ ਵਿੱਚ ਥਾਂ ਬਣਾਉਣ ਲਈ ਇੱਕ ਵੱਡਾ ਮੰਚ ਮੰਨਿਆ ਜਾ ਰਿਹਾ ਹੈ।