ਨਵੀਂ ਦਿੱਲੀ, 15 ਅਪ੍ਰੈਲ 2026: ਜਰਮਨੀ ਦੀ ਪ੍ਰਸਿੱਧ ਏਅਰਲਾਈਨ ਲੁਫਥਾਂਸਾ ਨੇ ਅਚਾਨਕ ਆਪਣੀਆਂ ਦੋ ਮਹੱਤਵਪੂਰਨ ਉਡਾਣਾਂ ਰੱਦ ਕਰਨ ਦਾ ਫੈਸਲਾ ਕੀਤਾ ਹੈ, ਜਿਸ ਨਾਲ 700 ਤੋਂ ਵੱਧ ਯਾਤਰੀ ਹਵਾਈ ਅੱਡੇ ‘ਤੇ ਹੀ ਫਸ ਗਏ। ਰੱਦ ਕੀਤੀਆਂ ਗਈਆਂ ਉਡਾਣਾਂ ਵਿੱਚ ਦਿੱਲੀ-ਫਰੈਂਕਫਰਟ (LH761) ਅਤੇ ਦਿੱਲੀ-ਮਿਊਨਿਖ (LH763) ਸ਼ਾਮਲ ਹਨ।
ਏਅਰਲਾਈਨ ਵੱਲੋਂ ਸ਼ੁਰੂਆਤੀ ਜਾਣਕਾਰੀ ਵਿੱਚ ਇਸ ਦੇ ਕਾਰਨ ਵਜੋਂ “ਓਪਰੇਸ਼ਨਲ ਕਾਰਨ” ਦਰਸਾਏ ਗਏ ਹਨ, ਜਿਵੇਂ ਕਿ ਕਰੂ ਮੈਂਬਰਾਂ ਦੀ ਕਮੀ ਜਾਂ ਜਹਾਜ਼ ਵਿੱਚ ਤਕਨੀਕੀ ਖਰਾਬੀ। ਹਾਲਾਂਕਿ, ਸੂਤਰਾਂ ਮੁਤਾਬਕ ਪਿਛਲੇ ਕੁਝ ਦਿਨਾਂ ਤੋਂ ਜਰਮਨੀ ਦੇ ਹਵਾਈ ਅੱਡਿਆਂ ‘ਤੇ ਗਰਾਊਂਡ ਸਟਾਫ ਅਤੇ ਸੁਰੱਖਿਆ ਕਰਮਚਾਰੀਆਂ ਦੀ ਹੜਤਾਲ ਕਾਰਨ ਲੁਫਥਾਂਸਾ ਦੇ ਗਲੋਬਲ ਸ਼ਡਿਊਲ ‘ਤੇ ਅਸਰ ਪਿਆ ਹੈ, ਜਿਸ ਦਾ ਪ੍ਰਭਾਵ ਦਿੱਲੀ ਤੋਂ ਜਾਣ ਵਾਲੀਆਂ ਉਡਾਣਾਂ ‘ਤੇ ਵੀ ਦੇਖਿਆ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ, ਫਰੈਂਕਫਰਟ ਅਤੇ ਮਿਊਨਿਖ ਹਵਾਈ ਅੱਡਿਆਂ ‘ਤੇ ਵੱਧ ਟ੍ਰੈਫਿਕ ਅਤੇ ਸਲਾਟ ਦੀ ਕਮੀ ਵੀ ਇੱਕ ਸੰਭਾਵਿਤ ਕਾਰਨ ਹੋ ਸਕਦੀ ਹੈ।
ਉਡਾਣਾਂ ਰੱਦ ਹੋਣ ਦੀ ਜਾਣਕਾਰੀ ਮਿਲਣ ‘ਤੇ ਟਰਮੀਨਲ-3 ‘ਤੇ ਯਾਤਰੀਆਂ ਨੇ ਨਾਰਾਜ਼ਗੀ ਜਤਾਈ ਅਤੇ ਵਿਰੋਧ ਕੀਤਾ। ਕਈ ਯਾਤਰੀਆਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਆਖਰੀ ਸਮੇਂ ‘ਤੇ ਸੂਚਨਾ ਮਿਲੀ, ਜਿਸ ਕਰਕੇ ਉਨ੍ਹਾਂ ਦੀਆਂ ਕਨੈਕਟਿੰਗ ਉਡਾਣਾਂ ਅਤੇ ਜ਼ਰੂਰੀ ਮੀਟਿੰਗਾਂ ਪ੍ਰਭਾਵਿਤ ਹੋਈਆਂ ਹਨ।