ਮੁੰਬਈ, 6 ਨਵੰਬਰ 2026: ਬੌਲੀਵੁੱਡ ਦੇ ਸੁਪਰਸਟਾਰ ਸ਼ਾਹਰੁਖ਼ ਖ਼ਾਨ ਆਪਣੀ ਆਉਣ ਵਾਲੀ ਫ਼ਿਲਮ ‘ਕਿੰਗ’ ਨੂੰ ਲੈ ਕੇ ਚਰਚਾ ਵਿੱਚ ਹਨ। ਫ਼ਿਲਮ ਦੇ ਗਾਣੇ ‘ਤੂ ਮਿਲ ਜਾਏ’ ਵਿੱਚ ਬ੍ਰਿਟਿਸ਼ ਗਾਇਕ ਅਤੇ ਗੀਤਕਾਰ ਐੱਡ ਸ਼ੀਰਨ ਦੇ ਅੰਗਰੇਜ਼ੀ ਬੋਲ ਯਾਦ ਕਰਨਾ ਸ਼ਾਹਰੁਖ਼ ਲਈ ਕਾਫ਼ੀ ਚੁਣੌਤੀਪੂਰਨ ਰਿਹਾ। ਅਦਾਕਾਰ ਨੇ ਖੁਦ ਸੋਸ਼ਲ ਮੀਡੀਆ ’ਤੇ ਇਸ ਗੱਲ ਦਾ ਜ਼ਿਕਰ ਕਰਦਿਆਂ ਦੱਸਿਆ ਕਿ ਐੱਡ ਸ਼ੀਰਨ ਦੇ ਤੇਜ਼ ਗਾਉਣ ਕਾਰਨ ਉਨ੍ਹਾਂ ਨੂੰ ਬੋਲ ਯਾਦ ਕਰਨ ਵਿੱਚ ਕਾਫ਼ੀ ਮੁਸ਼ਕਲ ਆਈ।
‘ਸ਼ੇਪ ਆਫ਼ ਯੂ’ ਅਤੇ ‘ਥਿੰਕਿੰਗ ਆਊਟ ਲਾਊਡ’ ਵਰਗੇ ਵਿਸ਼ਵ ਪ੍ਰਸਿੱਧ ਗੀਤਾਂ ਲਈ ਜਾਣੇ ਜਾਂਦੇ ਐੱਡ ਸ਼ੀਰਨ ਨੇ ਇਸ ਗਾਣੇ ਨੂੰ ਪ੍ਰਸਿੱਧ ਗਾਇਕ ਅਰਿਜੀਤ ਸਿੰਘ ਅਤੇ ਮਧੂਬੰਤੀ ਬਾਗਚੀ ਨਾਲ ਮਿਲ ਕੇ ਆਪਣੀ ਆਵਾਜ਼ ਦਿੱਤੀ ਹੈ। ਇਹ ਗਾਣਾ 2 ਨਵੰਬਰ ਨੂੰ ਸ਼ਾਹਰੁਖ਼ ਖ਼ਾਨ ਦੇ ਜਨਮਦਿਨ ਮੌਕੇ ਰਿਲੀਜ਼ ਕੀਤਾ ਗਿਆ ਸੀ। ਗਾਣੇ ਦਾ ਸੰਗੀਤ ਮਸ਼ਹੂਰ ਸੰਗੀਤਕਾਰ ਜੋੜੀ ਸਚਿਨ-ਜਿਗਰ ਨੇ ਤਿਆਰ ਕੀਤਾ ਹੈ। ਇਸ ਵਿੱਚ ਸ਼ਾਹਰੁਖ਼ ਖ਼ਾਨ ਦੇ ਨਾਲ ਦੀਪਿਕਾ ਪਾਦੂਕੋਣ ਵੀ ਨਜ਼ਰ ਆ ਰਹੀ ਹੈ।
ਐੱਡ ਸ਼ੀਰਨ ਦੇ ਤੇਜ਼ ਗਾਉਣ ਕਾਰਨ ਬੋਲ ਯਾਦ ਕਰਨਾ ਹੋਇਆ ਔਖਾ
ਗਾਣੇ ਦੀ ਵੀਡੀਓ ’ਤੇ ਟਿੱਪਣੀ ਕਰਦਿਆਂ ਸ਼ਾਹਰੁਖ਼ ਖ਼ਾਨ ਨੇ ਆਪਣੇ ਅਨੁਭਵ ਸਾਂਝੇ ਕੀਤੇ। ਉਨ੍ਹਾਂ ਲਿਖਿਆ, “ਤੂੰ ਇਹ ਸ਼ਬਦ ਕਿਵੇਂ ਯਾਦ ਰੱਖ ਲੈਂਦੀ ਹੈਂ!!! ਮੇਰੇ ਲਈ ਇਹ ਬਹੁਤ ਔਖਾ ਸੀ ਕਿਉਂਕਿ ਐੱਡ ਬਹੁਤ ਤੇਜ਼ ਗਾਉਂਦਾ ਹੈ।” ਉਨ੍ਹਾਂ ਦੀ ਇਸ ਟਿੱਪਣੀ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਗਾਣੇ ਦੇ ਅੰਗਰੇਜ਼ੀ ਹਿੱਸੇ ਨੂੰ ਯਾਦ ਕਰਨਾ ਉਨ੍ਹਾਂ ਲਈ ਆਸਾਨ ਨਹੀਂ ਸੀ।
ਇਸੇ ਦੌਰਾਨ ਸ਼ਾਹਰੁਖ਼ ਖ਼ਾਨ ਦੀ ਧੀ ਅਤੇ ਅਦਾਕਾਰਾ ਸੁਹਾਨਾ ਖ਼ਾਨ ਨੇ ਵੀਰਵਾਰ ਨੂੰ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ’ਤੇ ਇੱਕ ਵੀਡੀਓ ਸਾਂਝੀ ਕੀਤੀ। ਇਸ ਵੀਡੀਓ ਵਿੱਚ ਉਹ ਤਿਆਰ ਹੁੰਦੇ ਸਮੇਂ ‘ਤੂ ਮਿਲ ਜਾਏ’ ਗਾਣੇ ਵਿੱਚ ਐੱਡ ਸ਼ੀਰਨ ਦੇ ਅੰਗਰੇਜ਼ੀ ਰੈਪ ਵਾਲੇ ਹਿੱਸੇ ’ਤੇ ਲਿਪ-ਸਿੰਕ ਕਰਦੀ ਨਜ਼ਰ ਆਈ। ਸੁਹਾਨਾ ਦੀ ਇਸ ਵੀਡੀਓ ਨੇ ਵੀ ਗਾਣੇ ਨੂੰ ਲੈ ਕੇ ਪ੍ਰਸ਼ੰਸਕਾਂ ਦੀ ਦਿਲਚਸਪੀ ਵਧਾ ਦਿੱਤੀ ਹੈ।
ਸਿਧਾਰਥ ਆਨੰਦ ਕਰ ਰਹੇ ਹਨ ਫ਼ਿਲਮ ਦਾ ਨਿਰਦੇਸ਼ਨ
ਫ਼ਿਲਮ ‘ਕਿੰਗ’ ਦਾ ਨਿਰਦੇਸ਼ਨ ਸਿਧਾਰਥ ਆਨੰਦ ਕਰ ਰਹੇ ਹਨ, ਜੋ ਇਸ ਤੋਂ ਪਹਿਲਾਂ ਸ਼ਾਹਰੁਖ਼ ਖ਼ਾਨ ਨਾਲ 2023 ਵਿੱਚ ਸੁਪਰਹਿੱਟ ਫ਼ਿਲਮ ‘ਪਠਾਨ’ ਵਿੱਚ ਕੰਮ ਕਰ ਚੁੱਕੇ ਹਨ। ਰੈੱਡ ਚਿਲੀਜ਼ ਐਂਟਰਟੇਨਮੈਂਟ ਅਤੇ ਮਾਰਫਲਿਕਸ ਪਿਕਚਰਜ਼ ਦੇ ਬੈਨਰ ਹੇਠ ਬਣ ਰਹੀ ਇਸ ਫ਼ਿਲਮ ਵਿੱਚ ਅਭਿਸ਼ੇਕ ਬੱਚਨ ਵੀ ਅਹਿਮ ਭੂਮਿਕਾ ਵਿੱਚ ਨਜ਼ਰ ਆਉਣਗੇ। ਸੁਹਾਨਾ ਖ਼ਾਨ ਵੀ ਫ਼ਿਲਮ ਦੀ ਮੁੱਖ ਕਲਾਕਾਰਾਂ ਵਿੱਚ ਸ਼ਾਮਲ ਹੈ।
ਜ਼ਿਕਰਯੋਗ ਹੈ ਕਿ ਸ਼ਾਹਰੁਖ਼ ਖ਼ਾਨ 2023 ਤੋਂ ਬਾਅਦ ਵੱਡੇ ਪਰਦੇ ’ਤੇ ਆਪਣੀ ਅਗਲੀ ਫ਼ਿਲਮ ਨਾਲ ਵਾਪਸੀ ਕਰਨ ਜਾ ਰਹੇ ਹਨ। ਸਾਲ 2023 ਵਿੱਚ ਉਨ੍ਹਾਂ ਦੀਆਂ ਤਿੰਨ ਫ਼ਿਲਮਾਂ ‘ਪਠਾਨ’, ‘ਜਵਾਨ’ ਅਤੇ ‘ਡੰਕੀ’ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਈਆਂ ਸਨ। ਹੁਣ ‘ਕਿੰਗ’ ਨੂੰ ਲੈ ਕੇ ਪ੍ਰਸ਼ੰਸਕਾਂ ਵਿੱਚ ਕਾਫ਼ੀ ਉਤਸ਼ਾਹ ਦੇਖਣ ਨੂੰ ਮਿਲ ਰਿਹਾ ਹੈ।