ਇੰਗਲੈਂਡ ’ਚ ਸਿੱਖ ਬੱਸ ਡਰਾਈਵਰ ਨਾਲ ਕੁੱਟਮਾਰ ਤੋਂ ਬਾਅਦ ਬੱਸ ਖੋਹੀ, ਗਲਤ ਦਿਸ਼ਾ ’ਚ ਦੌੜਾਈ; ਕਈ ਵਾਹਨਾਂ ਨਾਲ ਟਕਰਾਈ

ਟੈਲਫੋਰਡ, 20 ਸਤੰਬਰ 2026:  ਇੰਗਲੈਂਡ ਦੇ ਟੈਲਫੋਰਡ ਸ਼ਹਿਰ ਵਿੱਚ ਇੱਕ ਸਿੱਖ ਬੱਸ ਡਰਾਈਵਰ ਨਾਲ ਕਥਿਤ ਕੁੱਟਮਾਰ ਕਰਨ ਅਤੇ ਉਸ ਤੋਂ ਬਾਅਦ ਬੱਸ ਖੋਹ ਕੇ ਖਤਰਨਾਕ ਢੰਗ ਨਾਲ ਚਲਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਹ ਘਟਨਾ ਸ਼ੁੱਕਰਵਾਰ ਸ਼ਾਮ ਕਰੀਬ 6:30 ਵਜੇ ਮੇਡਲੇ ਇਲਾਕੇ ਦੀ ਕੋਰਟ ਸਟ੍ਰੀਟ ’ਤੇ ਵਾਪਰੀ। ਪੁਲਿਸ ਨੇ ਮਾਮਲੇ ਵਿੱਚ ਇੱਕ 33 ਸਾਲਾ ਯਮਨੀ ਨਾਗਰਿਕ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਸ ਦੀ ਪਛਾਣ ਅਲੀ ਬਲਹਾਦ ਵਜੋਂ ਦੱਸੀ ਗਈ ਹੈ।

ਪੁਲਿਸ ਮੁਤਾਬਕ ਮੁਲਜ਼ਮ ਨੇ ਪਹਿਲਾਂ ਬੱਸ ਡਰਾਈਵਰ ਨਾਲ ਕਥਿਤ ਤੌਰ ’ਤੇ ਕੁੱਟਮਾਰ ਕੀਤੀ ਅਤੇ ਉਸ ਨੂੰ ਬੱਸ ਤੋਂ ਬਾਹਰ ਕੱਢ ਦਿੱਤਾ। ਇਸ ਤੋਂ ਬਾਅਦ ਉਸ ਨੇ ਬੱਸ ਦਾ ਸਟੀਅਰਿੰਗ ਸੰਭਾਲ ਲਿਆ ਅਤੇ ਉਸ ਨੂੰ ਤੇਜ਼ ਰਫ਼ਤਾਰ ਨਾਲ ਗਲਤ ਦਿਸ਼ਾ ਵਿੱਚ ਚਲਾਉਣਾ ਸ਼ੁਰੂ ਕਰ ਦਿੱਤਾ। ਇਸ ਦੌਰਾਨ ਬੱਸ ਕਈ ਹੋਰ ਵਾਹਨਾਂ ਨਾਲ ਟਕਰਾ ਗਈ। ਘਟਨਾ ਦੀ ਵੀਡੀਓ ਵੀ ਸਾਹਮਣੇ ਆਈ ਹੈ, ਜਿਸ ਵਿੱਚ ਹਮਲੇ ਤੋਂ ਲੈ ਕੇ ਬੱਸ ਖੋਹਣ ਤੱਕ ਦਾ ਘਟਨਾਕ੍ਰਮ ਨਜ਼ਰ ਆ ਰਿਹਾ ਹੈ।

ਵੀਡੀਓ ਵਿੱਚ ਡਰਾਈਵਰ ਨਾਲ ਕੁੱਟਮਾਰ ਦਾ ਦਾਅਵਾ

ਸਾਹਮਣੇ ਆਈ ਵੀਡੀਓ ਫੁਟੇਜ ਵਿੱਚ ਕਥਿਤ ਤੌਰ ’ਤੇ ਅਲੀ ਬਲਹਾਦ ਨੂੰ ਸਿੱਖ ਡਰਾਈਵਰ ਦੀ ਦਾੜ੍ਹੀ ਖਿੱਚਦੇ ਅਤੇ ਉਸ ਦੇ ਸਿਰ ’ਤੇ ਆਪਣੇ ਸਿਰ ਨਾਲ ਵਾਰ ਕਰਦੇ ਹੋਏ ਦੇਖਿਆ ਜਾ ਸਕਦਾ ਹੈ। ਇਸ ਦੌਰਾਨ ਇੱਕ ਔਰਤ ਨੇ ਘਟਨਾ ਦੀ ਵੀਡੀਓ ਬਣਾਉਂਦੇ ਹੋਏ ਮੁਲਜ਼ਮ ਨੂੰ ਅਜਿਹਾ ਕਰਨ ਤੋਂ ਰੋਕਣ ਦੀ ਕੋਸ਼ਿਸ਼ ਕੀਤੀ।

ਵੀਡੀਓ ਵਿੱਚ ਸਿੱਖ ਡਰਾਈਵਰ ਪੁਲਿਸ ਨੂੰ ਬੁਲਾਉਣ ਅਤੇ ਹਮਲਾਵਰ ਨੂੰ ਉਸ ਤੋਂ ਦੂਰ ਕਰਨ ਲਈ ਮਦਦ ਮੰਗਦਾ ਸੁਣਾਈ ਦਿੰਦਾ ਹੈ। ਇਸ ਤੋਂ ਬਾਅਦ ਮੁਲਜ਼ਮ ਨੇ ਕਥਿਤ ਤੌਰ ’ਤੇ ਬੱਸ ਦੇ ਡਰਾਈਵਰ ਕੈਬਿਨ ਵਿੱਚ ਭੰਨਤੋੜ ਕੀਤੀ ਅਤੇ ਕੁਝ ਤਾਰਾਂ ਖਿੱਚੀਆਂ। ਉਸ ਨੇ ਕੈਬਿਨ ਵਿੱਚੋਂ ਇੱਕ ਵਸਤੂ ਕੱਢ ਕੇ ਡਰਾਈਵਰ ਨੂੰ ਧਮਕਾਉਂਦੇ ਹੋਏ ਬੱਸ ਆਪਣੇ ਹਵਾਲੇ ਕਰਨ ਲਈ ਕਿਹਾ।

ਡਰਾਈਵਰ ਨੂੰ ਬਾਹਰ ਕੱਢ ਕੇ ਖੁਦ ਸੰਭਾਲਿਆ ਸਟੀਅਰਿੰਗ

ਪੁਲਿਸ ਮੁਤਾਬਕ ਇਹ ਹਮਲਾ ਇੱਕ ਮਿੰਟ ਤੋਂ ਵੱਧ ਸਮੇਂ ਤੱਕ ਚੱਲਿਆ। ਇਸ ਤੋਂ ਬਾਅਦ ਮੁਲਜ਼ਮ ਨੇ ਕਥਿਤ ਤੌਰ ’ਤੇ ਡਰਾਈਵਰ ਨੂੰ ਬੱਸ ਤੋਂ ਬਾਹਰ ਧੱਕ ਦਿੱਤਾ ਅਤੇ ਖੁਦ ਸਟੀਅਰਿੰਗ ਸੰਭਾਲ ਲਿਆ। ਬੱਸ ਲੈ ਕੇ ਉਹ ਪਾਰਕ ਵੇ ਤੋਂ ਹਾਈ ਸਟ੍ਰੀਟ ਵੱਲ ਵਧਿਆ।

ਇਸ ਦੌਰਾਨ ਬੱਸ ਨੂੰ ਸੜਕ ਦੀ ਗਲਤ ਦਿਸ਼ਾ ਵਿੱਚ ਤੇਜ਼ ਰਫ਼ਤਾਰ ਨਾਲ ਚਲਾਇਆ ਗਿਆ, ਜਿਸ ਕਾਰਨ ਕਈ ਵਾਹਨਾਂ ਨਾਲ ਟੱਕਰ ਹੋਈ। ਘਟਨਾ ਦੇ ਵੀਡੀਓ ਵਿੱਚ ਇੱਕ ਔਰਤ ਨੂੰ ਘਬਰਾਹਟ ਵਿੱਚ ਲੋਕਾਂ ਨੂੰ ਸੜਕ ਤੋਂ ਹਟਣ ਲਈ ਕਹਿੰਦੇ ਹੋਏ ਅਤੇ ਬੱਸ ਦੇ ਪਿੱਛੇ ਭੱਜਦੇ ਹੋਏ ਵੀ ਦੇਖਿਆ ਜਾ ਸਕਦਾ ਹੈ।

ਪੁਲਿਸ ਨੇ ਤੁਰੰਤ ਕੀਤੀ ਕਾਰਵਾਈ, ਮੁਲਜ਼ਮ ਗ੍ਰਿਫ਼ਤਾਰ

ਵੈਸਟ ਮਰਸੀਆ ਪੁਲਿਸ ਮੁਤਾਬਕ ਘਟਨਾ ਦੀ ਸੂਚਨਾ ਸ਼ਾਮ ਕਰੀਬ 6:37 ਵਜੇ ਮਿਲੀ। ਸੂਚਨਾ ਮਿਲਦੇ ਹੀ ਪੁਲਿਸ ਨੇ ਤੁਰੰਤ ਕਾਰਵਾਈ ਕੀਤੀ ਅਤੇ ਬੱਸ ਨੂੰ ਰੁਕਵਾ ਕੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਉਸ ਖ਼ਿਲਾਫ਼ ਬੱਸ ਖੋਹਣ ਅਤੇ ਖਤਰਨਾਕ ਢੰਗ ਨਾਲ ਵਾਹਨ ਚਲਾਉਣ ਸਬੰਧੀ ਕਾਰਵਾਈ ਕੀਤੀ ਜਾ ਰਹੀ ਹੈ।

ਹਮਲੇ ਵਿੱਚ ਸਿੱਖ ਬੱਸ ਡਰਾਈਵਰ ਨੂੰ ਮਾਮੂਲੀ ਸੱਟਾਂ ਲੱਗੀਆਂ, ਜਿਨ੍ਹਾਂ ਦਾ ਇਲਾਜ ਕੀਤਾ ਗਿਆ। ਪੁਲਿਸ ਮੁਤਾਬਕ ਘਟਨਾ ਦੌਰਾਨ ਕਿਸੇ ਹੋਰ ਵਿਅਕਤੀ ਦੇ ਜ਼ਖ਼ਮੀ ਹੋਣ ਦੀ ਸੂਚਨਾ ਨਹੀਂ ਹੈ। ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਪੁਲਿਸ ਵੱਲੋਂ ਘਟਨਾ ਨਾਲ ਸਬੰਧਤ ਵੀਡੀਓ ਫੁਟੇਜ ਅਤੇ ਹੋਰ ਸਬੂਤਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।