ਚੰਡੀਗੜ੍ਹ, 15 ਮਾਰਚ 2026: Bar Council of Punjab and Haryana ਦੀਆਂ ਚੋਣਾਂ ਲਈ ਤਿਆਰੀਆਂ ਹੁਣ ਅਖੀਰਲੇ ਪੜਾਅ ‘ਚ ਪਹੁੰਚ ਚੁੱਕੀਆਂ ਹਨ। ਕੌਂਸਲ ਦੇ 23 ਮੈਂਬਰੀ ਅਹੁਦਿਆਂ ਲਈ ਹੋਣ ਵਾਲੀਆਂ ਚੋਣਾਂ ਵਿੱਚ ਇਸ ਵਾਰ ਕੁੱਲ 157 ਉਮੀਦਵਾਰ ਮੈਦਾਨ ਵਿੱਚ ਹਨ, ਜਿਨ੍ਹਾਂ ਵਿੱਚ 53 ਮਹਿਲਾ ਵਕੀਲ ਵੀ ਸ਼ਾਮਲ ਹਨ। ਇਹ ਚੋਣਾਂ ਕਈ ਮਾਇਨਿਆਂ ਵਿੱਚ ਖਾਸ ਮੰਨੀਆਂ ਜਾ ਰਹੀਆਂ ਹਨ ਕਿਉਂਕਿ ਪਹਿਲੀ ਵਾਰ ਕੌਂਸਲ ਵਿੱਚ ਘੱਟੋ-ਘੱਟ ਸੱਤ ਮਹਿਲਾ ਮੈਂਬਰਾਂ ਦੀ ਨੁਮਾਇੰਦਗੀ ਯਕੀਨੀ ਬਣੇਗੀ। ਕੁੱਲ 1,14,758 ਵਕੀਲ ਆਪਣਾ ਵੋਟ ਦਾ ਅਧਿਕਾਰ ਵਰਤਣਗੇ। ਪੰਜਾਬ ਅਤੇ ਹਰਿਆਣਾ ਵਿੱਚ ਵੋਟਿੰਗ 18 ਮਾਰਚ ਨੂੰ ਹੋਵੇਗੀ, ਜਦਕਿ ਚੰਡੀਗੜ੍ਹ ਵਿੱਚ ਵੋਟਾਂ 17 ਮਾਰਚ ਨੂੰ ਪਾਈਆਂ ਜਾਣਗੀਆਂ। ਵੋਟਾਂ ਦੀ ਗਿਣਤੀ 20 ਮਾਰਚ ਤੋਂ Punjab and Haryana High Court ਦੇ ਕੰਪਲੈਕਸ ਵਿੱਚ ਸ਼ੁਰੂ ਹੋਵੇਗੀ ਅਤੇ ਇਸ ਪ੍ਰਕਿਰਿਆ ਨੂੰ ਪੂਰਾ ਹੋਣ ਵਿੱਚ ਇਕ ਮਹੀਨੇ ਤੋਂ ਵੱਧ ਸਮਾਂ ਲੱਗ ਸਕਦਾ ਹੈ।
ਵੋਟਰਾਂ ਦੀ ਗਿਣਤੀ ਮੁਤਾਬਕ ਹਰਿਆਣਾ ਵਿੱਚ 59,345, ਪੰਜਾਬ ਵਿੱਚ 37,873 ਅਤੇ ਚੰਡੀਗੜ੍ਹ ਵਿੱਚ 17,540 ਵਕੀਲ ਵੋਟ ਪਾਉਣਗੇ। ਹਰਿਆਣਾ ਵਿੱਚ ਵੋਟਿੰਗ ਲਈ 106 ਕੇਂਦਰ ਬਣਾਏ ਗਏ ਹਨ। ਵੋਟਰਾਂ ਦੀ ਸਭ ਤੋਂ ਵੱਧ ਗਿਣਤੀ ਗੁਰੂਗ੍ਰਾਮ ਜ਼ਿਲ੍ਹੇ ਵਿੱਚ ਹੈ, ਜਿੱਥੇ 10 ਬੂਥਾਂ ‘ਤੇ 7,498 ਵਕੀਲ ਵੋਟ ਪਾਉਣਗੇ। ਇਸ ਦੇ ਉਲਟ ਭਿਵਾਨੀ ਜ਼ਿਲ੍ਹੇ ਦੇ ਤੋਸ਼ਾਮ ਵਿੱਚ ਸਿਰਫ਼ 89 ਵੋਟਰ ਦਰਜ ਕੀਤੇ ਗਏ ਹਨ, ਜੋ ਸਭ ਤੋਂ ਘੱਟ ਗਿਣਤੀ ਹੈ।
ਪੰਜਾਬ ਵਿੱਚ ਕੁੱਲ 37,873 ਵਕੀਲ ਆਪਣੀ ਵੋਟ ਦਾ ਅਧਿਕਾਰ ਵਰਤਣਗੇ। ਇੱਥੇ ਸਭ ਤੋਂ ਵੱਧ ਚੋਣੀ ਗਤੀਵਿਧੀਆਂ ਲੁਧਿਆਣਾ ਵਿੱਚ ਦੇਖਣ ਨੂੰ ਮਿਲਣਗੀਆਂ, ਜਿੱਥੇ 5,230 ਵੋਟਰ ਹਨ। ਇਸ ਤੋਂ ਬਾਅਦ ਜਲੰਧਰ ਵਿੱਚ 3,490 ਅਤੇ ਅੰਮ੍ਰਿਤਸਰ ਵਿੱਚ 3,454 ਵਕੀਲ ਵੋਟ ਪਾਉਣਗੇ। ਦੂਜੇ ਪਾਸੇ ਸੰਗਰੂਰ ਜ਼ਿਲ੍ਹੇ ਦੇ ਮੂਨਕ ਵਿੱਚ ਕੇਵਲ 84 ਵੋਟਰ ਦਰਜ ਕੀਤੇ ਗਏ ਹਨ। ਇਸ ਤੋਂ ਇਲਾਵਾ ਸਰਦੂਲਗੜ੍ਹ ਵਿੱਚ 110 ਅਤੇ ਫੂਲ ਤੇ ਜ਼ੀਰਾ ਵਿੱਚ 111-111 ਵੋਟਰ ਹਨ।
ਚੰਡੀਗੜ੍ਹ ਵਿੱਚ ਕੁੱਲ 17,540 ਵਕੀਲ ਵੋਟ ਪਾਉਣਗੇ। ਇਨ੍ਹਾਂ ਵਿੱਚੋਂ 14,081 ਵੋਟਰ Punjab and Haryana High Court, Central Administrative Tribunal (CAT) ਅਤੇ Debt Recovery Tribunal (DRT) ਕੇਂਦਰਾਂ ‘ਤੇ ਵੋਟ ਪਾਉਣਗੇ, ਜਦਕਿ 3,459 ਵੋਟਰ ਜ਼ਿਲ੍ਹਾ ਅਦਾਲਤ ਚੰਡੀਗੜ੍ਹ ਵਿੱਚ ਆਪਣੇ ਵੋਟ ਦਾ ਅਧਿਕਾਰ ਵਰਤਣਗੇ। ਚੋਣਾਂ ਨੂੰ ਲੈ ਕੇ ਵਕੀਲਾਂ ਵਿੱਚ ਖਾਸਾ ਉਤਸ਼ਾਹ ਦੇਖਿਆ ਜਾ ਰਿਹਾ ਹੈ ਅਤੇ ਕਈ ਤਜਰਬੇਕਾਰ ਤੇ ਮਸ਼ਹੂਰ ਚਿਹਰੇ ਵੀ ਮੈਦਾਨ ਵਿੱਚ ਉਤਰ ਕੇ ਮੁਕਾਬਲੇ ਨੂੰ ਦਿਲਚਸਪ ਬਣਾ ਰਹੇ ਹਨ।
ਇਸ ਚੋਣ ਵਿੱਚ ਕਈ ਪੁਰਾਣੇ ਅਤੇ ਮੰਨੇ-ਪ੍ਰਮੰਨੇ ਚਿਹਰੇ ਵੀ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ, ਜਿਨ੍ਹਾਂ ਵਿੱਚ ਸਾਬਕਾ ਚੇਅਰਮੈਨ Pratap Singh, Vijender Singh Ahlawat, Lekh Raj Sharma, Suvir Sidhu, Jaiveer Yadav ਅਤੇ Karanjit Rakesh Gupta ਸ਼ਾਮਲ ਹਨ।
ਚੋਣ ਪ੍ਰਕਿਰਿਆ ਕਿਵੇਂ ਹੋਵੇਗੀ
ਬਾਰ ਕੌਂਸਲ ਦੇ ਮੈਂਬਰ ਅਤੇ ਸਾਬਕਾ ਚੇਅਰਮੈਨ Vijender Singh Ahlawat ਦੇ ਅਨੁਸਾਰ ਕੌਂਸਲ ਦੇ ਕੁੱਲ 25 ਮੈਂਬਰਾਂ ਵਿੱਚੋਂ 23 ਅਹੁਦਿਆਂ ਲਈ ਚੋਣ ਕਰਵਾਈ ਜਾ ਰਹੀ ਹੈ। ਇਨ੍ਹਾਂ ਵਿੱਚ 18 ਸੀਟਾਂ ਆਮ ਸ਼੍ਰੇਣੀ ਲਈ ਹਨ, ਜਦਕਿ ਪੰਜ ਸੀਟਾਂ ਮਹਿਲਾ ਵਕੀਲਾਂ ਲਈ ਰਾਖਵੀਆਂ ਹਨ। ਇਸ ਤੋਂ ਇਲਾਵਾ ਦੋ ਮਹਿਲਾ ਮੈਂਬਰ ਨਾਮਜ਼ਦ ਕੀਤੀਆਂ ਜਾਣਗੀਆਂ। ਪਿਛਲੀ ਮਿਆਦ ਦੌਰਾਨ ਕੌਂਸਲ ਵਿੱਚ ਕੋਈ ਵੀ ਮਹਿਲਾ ਮੈਂਬਰ ਨਹੀਂ ਸੀ, ਪਰ ਇਸ ਵਾਰ ਸੱਤ ਮਹਿਲਾ ਮੈਂਬਰਾਂ ਦੀ ਨੁਮਾਇੰਦਗੀ ਯਕੀਨੀ ਬਣ ਰਹੀ ਹੈ।
ਬਾਰ ਕੌਂਸਲ ਦੀਆਂ ਚੋਣਾਂ ਆਮ ਬਹੁਮਤ ਨਾਲ ਨਹੀਂ ਹੁੰਦੀਆਂ, ਸਗੋਂ ਤਰਜੀਹ ਅਧਾਰਿਤ ਵੋਟਿੰਗ ਪ੍ਰਣਾਲੀ ਰਾਹੀਂ ਕਰਵਾਈਆਂ ਜਾਂਦੀਆਂ ਹਨ। ਇਹ ਪ੍ਰਣਾਲੀ ਕਾਫੀ ਹੱਦ ਤੱਕ ਰਾਸ਼ਟਰਪਤੀ ਚੋਣਾਂ ਵਿੱਚ ਵਰਤੀ ਜਾਣ ਵਾਲੀ ਸਿੰਗਲ ਟ੍ਰਾਂਸਫਰੇਬਲ ਵੋਟ ਪ੍ਰਣਾਲੀ ਵਰਗੀ ਹੈ। ਇਸ ਵਿੱਚ ਵੋਟਰ ਬੈਲਟ ਪੇਪਰ ‘ਤੇ ਉਮੀਦਵਾਰਾਂ ਦੇ ਸਾਹਮਣੇ 1, 2, 3, 4 ਆਦਿ ਦੇ ਰੂਪ ਵਿੱਚ ਆਪਣੀ ਤਰਜੀਹ ਦਰਜ ਕਰਦਾ ਹੈ ਅਤੇ ਉਸੇ ਅਧਾਰ ‘ਤੇ ਵੋਟਾਂ ਦੀ ਗਿਣਤੀ ਕਰਕੇ ਜੇਤੂ ਉਮੀਦਵਾਰਾਂ ਦਾ ਐਲਾਨ ਕੀਤਾ ਜਾਂਦਾ ਹੈ।