ਚੰਡੀਗੜ੍ਹ, 23 ਫਰਵਰੀ 2026: ਪੰਜਾਬ ਦੇ ਵਿੱਤ, ਯੋਜਨਾਬੰਦੀ, ਆਬਕਾਰੀ ਅਤੇ ਕਰ ਮੰਤਰੀ ਐਡਵੋਕੇਟ ਹਰਪਾਲ ਸਿੰਘ ਚੀਮਾ ਨੇ ਕਿਹਾ ਕਿ ਸਾਲ 2026-27 ਲਈ ਰਾਜ ਦਾ ਆਬਕਾਰੀ ਮਾਲੀਆ ₹12,800 ਕਰੋੜ ਤੱਕ ਪਹੁੰਚਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਆਬਕਾਰੀ ਖੇਤਰ ਵਿੱਚ ਕੀਤੇ ਗਏ ਸੁਧਾਰਾਂ ਨੇ ਨਾ ਸਿਰਫ਼ ਸਰਕਾਰੀ ਆਮਦਨ ਵਿੱਚ ਵਾਧਾ ਕੀਤਾ ਹੈ, ਸਗੋਂ ਸਕੂਲਾਂ, ਹਸਪਤਾਲਾਂ ਅਤੇ ਹੋਰ ਲੋਕ-ਭਲਾਈ ਯੋਜਨਾਵਾਂ ਲਈ ਵਿੱਤੀ ਸਰੋਤ ਵੀ ਮਜ਼ਬੂਤ ਕੀਤੇ ਹਨ।
ਨਵੀਂ ਆਬਕਾਰੀ ਨੀਤੀ ਦਾ ਐਲਾਨ ਕਰਦੇ ਹੋਏ ਮੰਤਰੀ ਨੇ ਕਿਹਾ ਕਿ ਪਿਛਲੀਆਂ ਕਾਂਗਰਸ ਅਤੇ ਅਕਾਲੀ-ਭਾਜਪਾ ਸਰਕਾਰਾਂ ਦੇ ਦੌਰਾਨ ਆਬਕਾਰੀ ਖੇਤਰ ਵਿੱਚ ਰਹੀ ਖੜੋਤ ਨੂੰ ਮੌਜੂਦਾ ਸਰਕਾਰ ਨੇ ਤੋੜਿਆ ਹੈ। ਹੁਣ ਇਹ ਖੇਤਰ ਪਾਰਦਰਸ਼ਤਾ, ਸਖ਼ਤ ਲਾਗੂਕਰਨ ਅਤੇ ਵਿਕਾਸ-ਕੇਂਦਰਿਤ ਨੀਤੀਆਂ ਨਾਲ ਚੱਲ ਰਿਹਾ ਹੈ, ਜਿਸ ਨਾਲ ਗੈਰ-ਕਾਨੂੰਨੀ ਵਪਾਰ ‘ਤੇ ਨਕੇਲ ਪਈ ਹੈ ਅਤੇ ਰਿਕਾਰਡ ਮਾਲੀਆ ਇਕੱਠਾ ਹੋ ਰਿਹਾ ਹੈ।
ਪੰਜਾਬ ਭਵਨ ਵਿੱਚ ਪ੍ਰੈਸ ਕਾਨਫਰੰਸ ਦੌਰਾਨ ਆਬਕਾਰੀ ਅਤੇ ਕਰ ਕਮਿਸ਼ਨਰ ਜਤਿੰਦਰ ਜੋਰਵਾਲ ਦੇ ਨਾਲ ਵਿਸਥਾਰਪੂਰਵਕ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਕਿਹਾ ਕਿ 2011-12 ਵਿੱਚ ਅਕਾਲੀ-ਭਾਜਪਾ ਸਰਕਾਰ ਸਮੇਂ ਆਬਕਾਰੀ ਮਾਲੀਆ ਕੇਵਲ ₹2,755 ਕਰੋੜ ਸੀ। ਕਾਂਗਰਸ ਸਰਕਾਰ ਦੌਰਾਨ 2021-22 ਵਿੱਚ ਇਹ ਵੱਧ ਕੇ ₹6,255 ਕਰੋੜ ਤੱਕ ਹੀ ਪਹੁੰਚਿਆ।
ਉਨ੍ਹਾਂ ਦੱਸਿਆ ਕਿ 2022-23 ਵਿੱਚ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠ ਨਵਾਂ ਨੀਤੀਗਤ ਢਾਂਚਾ ਲਾਗੂ ਕਰਨ ਤੋਂ ਬਾਅਦ ਰਾਜ ਨੇ ₹8,428 ਕਰੋੜ ਦਾ ਰਿਕਾਰਡ ਮਾਲੀਆ ਇਕੱਠਾ ਕੀਤਾ। ਇਹ ਰਫ਼ਤਾਰ ਜਾਰੀ ਰਹੀ ਅਤੇ 2024-25 ਵਿੱਚ ਆਮਦਨ ₹10,744 ਕਰੋੜ ਤੱਕ ਪਹੁੰਚ ਗਈ, ਜਦਕਿ 2025-26 ਲਈ ₹11,200 ਕਰੋੜ ਦੇ ਟੀਚੇ ਵੱਲ ਵੀ ਤੇਜ਼ੀ ਨਾਲ ਅੱਗੇ ਵਧਿਆ ਜਾ ਰਿਹਾ ਹੈ।
ਨਵੀਂ ਨੀਤੀ ਦੇ ਮੁੱਖ ਬਿੰਦੂ
ਵਿੱਤ ਮੰਤਰੀ ਨੇ ਦੱਸਿਆ ਕਿ ਮੌਜੂਦਾ ਪ੍ਰਚੂਨ ਲਾਇਸੈਂਸਾਂ ਨੂੰ 2025-26 ਲਈ 6.5% ਫੀਸ ਵਾਧੇ ਨਾਲ ਨਵੀਨੀਕਰਤ ਕੀਤਾ ਜਾਵੇਗਾ। ਜਿੱਥੇ ਨਵੀਨੀਕਰਨ ਨਹੀਂ ਹੋਵੇਗਾ, ਉੱਥੇ ਪਾਰਦਰਸ਼ੀ ਈ-ਟੈਂਡਰ ਪ੍ਰਕਿਰਿਆ ਰਾਹੀਂ ਅਲਾਟਮੈਂਟ ਕੀਤੀ ਜਾਵੇਗੀ।
ਉਨ੍ਹਾਂ ਕਿਹਾ ਕਿ 50 ਅਤੇ 65 ਡਿਗਰੀ ਪੰਜਾਬ ਮੀਡੀਅਮ ਲਿਕਰ (ਪੀਐਮਐਲ) ਦਾ ਕੋਟਾ 3% ਵਧਾ ਕੇ 87.9 ਮਿਲੀਅਨ ਪਰੂਫ ਲੀਟਰ ਕੀਤਾ ਗਿਆ ਹੈ। ਗੈਰ-ਕਾਨੂੰਨੀ ਸ਼ਰਾਬ ‘ਤੇ ਰੋਕ ਲਗਾਉਣ ਲਈ ਉੱਚ-ਅਪਰਾਧ ਵਾਲੇ ਖੇਤਰਾਂ ਵਿੱਚ 40 ਡਿਗਰੀ ਪੀਐਮਐਲ ਦੀ ਵਿਸ਼ੇਸ਼ ਸਬ-ਵਿੰਡੋ ਵੀ ਸ਼ੁਰੂ ਕੀਤੀ ਜਾਵੇਗੀ।
ਕਾਰੋਬਾਰ ਵਿੱਚ ਸਰਲਤਾ ਅਤੇ ਉਦਯੋਗਿਕ ਉਤਸ਼ਾਹ
ਚੀਮਾ ਨੇ ਐਲਾਨ ਕੀਤਾ ਕਿ ਈਡੀਪੀ ਅਤੇ ਈਬੀਪੀ ਅਧੀਨ ਬ੍ਰਾਂਡਾਂ ਦੀ ਕੀਮਤ ਮਨਜ਼ੂਰੀ ਲਈ ਆਟੋ-ਕਲੀਅਰੈਂਸ ਪ੍ਰਣਾਲੀ ਲਾਗੂ ਕੀਤੀ ਜਾਵੇਗੀ, ਜਿਸ ਨਾਲ ਦਫਤਰੀ ਦੇਰੀ ਘਟੇਗੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਯੂਨਿਟਾਂ ਦੀ ਕਾਰਗੁਜ਼ਾਰੀ ਵਧਾਉਣ ਲਈ ਸੰਚਾਲਨ ਅਤੇ ਡਿਸਪੈਚ ਸਮੇਂ ਵਿੱਚ ਵਾਧਾ ਕਰਨ ‘ਤੇ ਕੰਮ ਹੋ ਰਿਹਾ ਹੈ।
ਉਦਯੋਗਿਕ ਖੇਤਰ ਨੂੰ ਮਜ਼ਬੂਤ ਕਰਨ ਲਈ ਰਾਜ ਵਿੱਚ ਮਾਲਟ ਨਿਰਮਾਣ ਯੂਨਿਟਾਂ ਦੀ ਸਥਾਪਨਾ ਨੂੰ ਉਤਸ਼ਾਹਿਤ ਕੀਤਾ ਜਾਵੇਗਾ। ਇਸ ਨਾਲ ਪੰਜਾਬ ਬੋਤਲਿੰਗ ਹੱਬ ਤੋਂ ਉੱਚ-ਗੁਣਵੱਤਾ ਉਤਪਾਦਨ ਕੇਂਦਰ ਵੱਲ ਕਦਮ ਵਧਾਏਗਾ। ਰਾਜ ਦੇ ਅੰਦਰ ਹੀ ਜੌਂ ਦੀ ਪ੍ਰੋਸੈਸਿੰਗ ਤੋਂ ਪ੍ਰੀਮੀਅਮ ਮਾਲਟ ਡਿਸਟਿਲੇਸ਼ਨ ਤੱਕ ਪੂਰਾ ਉਤਪਾਦਨ ਚੱਕਰ ਵਿਕਸਤ ਕਰਕੇ ਬਾਹਰੀ ਸਪਿਰਟ ‘ਤੇ ਨਿਰਭਰਤਾ ਘਟਾਈ ਜਾਵੇਗੀ। ਇਹ ਕਦਮ ਖੇਤੀਬਾੜੀ ਖੇਤਰ ਲਈ ਵੀ ਲਾਭਕਾਰੀ ਸਾਬਤ ਹੋਵੇਗਾ।
ਤਸਕਰੀ ਵਿਰੁੱਧ ਸਖ਼ਤ ਕਾਰਵਾਈ
ਮੰਤਰੀ ਨੇ ਦੱਸਿਆ ਕਿ ਗੁਆਂਢੀ ਰਾਜਾਂ ਅਤੇ ਚੰਡੀਗੜ੍ਹ ਤੋਂ ਹੋਣ ਵਾਲੀ ਸ਼ਰਾਬ ਤਸਕਰੀ ਵਿਰੁੱਧ ਜ਼ੀਰੋ-ਟੋਲਰੈਂਸ ਨੀਤੀ ਅਪਣਾਈ ਗਈ ਹੈ। ਇਸ ਤਹਿਤ 4,406 ਐਫਆਈਆਰ ਦਰਜ ਕੀਤੀਆਂ ਗਈਆਂ ਅਤੇ 4,324 ਵਿਅਕਤੀ ਗ੍ਰਿਫਤਾਰ ਕੀਤੇ ਗਏ। 26,218 ਛਾਪੇਮਾਰੀਆਂ ਅਤੇ 24,832 ਨਾਕਿਆਂ ਦੌਰਾਨ 455 ਵਾਹਨ ਅਤੇ 1,76,552 ਬੋਤਲਾਂ ਜ਼ਬਤ ਹੋਈਆਂ। ਇਸ ਤੋਂ ਇਲਾਵਾ 38,23,576 ਲੀਟਰ ਕੱਚਾ ਮਾਲ ਨਸ਼ਟ ਕੀਤਾ ਗਿਆ, 82,990 ਲੀਟਰ ਈਥਾਨੌਲ ਅਤੇ ਈਐਨਏ ਅਤੇ 66,794 ਲੀਟਰ ਨਾਜਾਇਜ਼ ਸ਼ਰਾਬ ਬਰਾਮਦ ਕੀਤੀ ਗਈ, ਜਦਕਿ 374 ਮੋਬਾਈਲ ਡਿਸਟਿਲਰੀਆਂ ਤਬਾਹ ਕੀਤੀਆਂ ਗਈਆਂ।
ਉਨ੍ਹਾਂ ਕਿਹਾ ਕਿ ਇਹ ਕਾਰਵਾਈਆਂ ਸਰਕਾਰ ਦੀ ਕਾਨੂੰਨ-ਵਿਵਸਥਾ ਅਤੇ ਜਨਤਕ ਸੁਰੱਖਿਆ ਪ੍ਰਤੀ ਵਚਨਬੱਧਤਾ ਨੂੰ ਦਰਸਾਉਂਦੀਆਂ ਹਨ।